Papitu Anak sane Kapilih Dados Pengayah
6
Ritatkala punika,
ngancan ngakehang para pengiring Sang Hyang Yesuse.
Nanging soroh anak Yahudine sane mabasa Yunani,
ambul-ambul kapining soroh anak Yahudi sane mabasa Ibrani.
Krana para janda sane mabasa Yunani punika nenten karunguang nganggen bea idup sadina-dina.
2 Punika mawinan makaroras utusan munduhang makasami pengiring Sang Hyang Yesuse sane wenten ring Yerusalem.
Irika raris para utusane punika mabaos sapuniki,
“Nenten patut titiang sami ngalain tugas midartayang pengajahan saking Sang Hyang Pengardi krana ngurusin kaperluan sadina-dina para jandane.
3 Becik yening para semeton milih papitu anak lanang sane dharma lan sane kaebekin olih Roh Sang Hyang Pengardi,
turmaning wicaksana.
Ipun sane jagi ngurusin indik ajengan,
4 mangdane titiang lan para utusan sane lianan prasida mabakti lan midartayang pengajahan kamanten.”
5 Raris makasami pengiring Sang Hyang Yesuse punika nerima baos para utusane.
Irika raris ipun sami milih Stepanus,
inggih punika anak sane pracaya pisan ring Sang Hyang Pengardi saha kaebekin Roh Idane.
Tur ipun sami milih Pilipus,
Prokorus,
Nikanor,
Timon sareng Parmenas.
Kenten pada,
ipun milih Nikolaus saking Kota Antiokia sane sareng magama Yahudi.
6 Makapitu anake punika kabakta ring arepan para utusan,
raris utusane punika nunas icayang ring Sang Hyang Pengardi antuk ngenahang tangannyane ring anake makapitu punika mangda nglaksanayang ayah-ayahane kapining para jandane.
7 Sekadi punika pengajahan saking Sang Hyang Pengardi ngancan kasub tur para pengiring Sang Hyang Yesuse ring Yerusalem ngancan ngakehang.
Lan akeh pada para rsine sane pracaya ring Sang Hyang Yesus.
Dane Stepanus Kabakta ring Arepan Pengadilan Agama Yahudine
8 Kaceritayang mangkin,
dane Stepanus kicen wara nugraha lan kuasa saking Sang Hyang Pengardi.
Dane makarya praciri lan paindikan-paindikan sane ngangobin ring arepan anake akeh.
9 Nanging wenten anak Yahudi sane nglawan dane Stepanus tur majulat raos sareng dane.
Anake punika nenten tios krama saking bale wantilan agama Yahudi sane kasambat ‘Bale Wantilan Anak Merdeka.’
Ipun sami saking Kota Kirene,
Kota Aleksandria,
lan saking Propinsi Kilikia tur Propinsi Asia Alit.
10 Nanging ipun sami nenten mresidayang nglawan dane Stepanus krana Roh Sang Hyang Pengardi ngicen kawicaksanaan buat dane mawicara.
11 Irika raris ipun sami ngupah makudang anak lanang mangda mabaos sapuniki,
“Tiang sami mirengin anake puniki degag kapining dane Musa lan Sang Hyang Pengardi.”
12 Ipun sami malaksana sekadi punika buat manes-manesin anake akeh,
para penglingsire tur guru-guru agama Yahudine.
Irika raris dane Stepanus kaejuk tur kabakta ring arepan Pengadilan Agama Yahudine.
13 Samaliha anak Yahudine punika makta saksi-saksi palsu sane mabaos sapuniki,
“Anake puniki setata nganistayang Genah Agung Mabakti lan ukum agama iragane.
14 Tiang sami mirengin ipun ngamaosang indik Yesus saking Desa Nasaret punika jagi nguugang Genah Agung Mabakti kapining Sang Hyang Pengardi.
Kenten pada Yesus punika jagi ngubah awig-awig agama Yahudine sane terima iraga saking dane Musa.”
15 Anake sami sane malinggih ring pengadilan agamane nlektekin dane Stepanus,
tur ipun sami nyingak muan danene sekadi prarain malekat.